Ələt-Astara magistralının 26-cı kilometrində, Salyandan keçən hissəsində baş vermiş dəhşətli qəzada ölənlərin sayı 4-ə çatıb. Bu haqda məlumatı Cenublu.az bu gün, 6 aprel tarixində Qafqazinfo-ya istinadən verir.
Belə ki, Lənkəran qeydiyyatlı 42-BM-084 nişanlı yük avtomobilinin sürücüsü, 22 yaşlı Dadaşov Əli Səfail oğlunun yolun kənarında dayanmış “Hyundai Accent”i vurması nəticəsində ağır yaralanan 3 yaşlı Bağırov Bayxan Bayram oğlu da aldığı xəsarətlərdən xəstəxanada ölüb.
Qeyd edək ki, baş vermiş qəza nəticəsində 51 yaşlı Bağırova Dilarə Ramil qızı, 63 yaşlı Muradova Mirsəkinə Mirqiyam qızı və 48 yaşlı Hüseynova Elnurə Adil qızı hadisə yerində ölüb. Avtomobildə olan digər sərnişin, 52 yaşlı Ağayeva Xannənə Qabil qızı, sürücülər - Hüseynov Elxan Ramil oğlu və Dadaşov Əli Səfail oğlu isə xəsarət alıblar.
Qəzada həlak olan 51 yaşlı Bağırova Dilarə Ramil qızı Neftçalada yerləşən "Sharm Gözəllik salonu"nun əməkdaşı olub. Vəfat edən 3 yaşlı Bağırov Bayxan Bayram oğlu onun nəvəsi idi. Dilarə Bağırova tanınmış sintezator ifaçısı Bayram Bağırsoyun anası, 3 yaşlı Bayxan isə oğludur.
4 nəfərin ölümünə səbəb olan “KamAZ”ın 22 yaşlı sürücüsü Əli Dadaşov isə Vətən müharibəsi qazisidir. O, müharibədə iştirakına görə “Şuşanın azad olunmasına görə”, “Suqovuşanın azad olunmasına görə”, “Cəsur döyüşçü” və digər medallarla təltif edilib. Müharibədən qayıtdıqdan sonra Ə.Dadaşov “KamAZ” markalı yük avtomobilini icarəyə götürərək mişardaşı alverinə və daşınmasına başlayıb. O, avtomobilin ön hissəsinə “Veteran” və digər sözləri yapışdırıb.
O da məlum olub ki, hadisə vaxtı Neftçaladan Bakıya gələn “Hyundai Accent”in sürücüsü Elxan Hüseynov maşında nasazlıq olduğunu düşünərək nəqliyyat vasitəsini Ələt-Astara magistralının Salyandan keçən hissəsində, 26-cı kilometrində yolun sağına çəkərək saxlayıb. Bu zaman arxadan sürətlə hərəkət edən Əli Dadaşovun sürdüyü “KamAZ” arxadan ona çarpılıb.
