Bu gün Azərbaycan ordusunun mayoru, Tovuz döyüşlərinin qəhrəmanı, “akula” ləqəbli Anar Novruzovun şəhidlik zirvəsinə ucalan gündür. Bu haqda məlumatı Cenublu.az verir.
Anar Gülverdi oğlu Novruzov 12 may 1976-cı ildə Masallının Ərkivan qəsəbəsinin Abbaslı məhəlləsində anadan olub. 10 uşaqlı ailənin sonbeşiyi olan mayorumuzun atası bərbər, anası isə evdar xanım olub. Ərkivan qəsəbə 1 saylı tam orta məktəbi bitirdikdən sonra Heydər Əliyev adına Azərbaycan Ali Hərbi Məktəbinə daxil olub. Lakin təhsilini yarımçıq saxlayaraq, Orduya könüllü yazılıb. Daha sonra atəşkəs elan olunduqda geri dönür və təhsilini davam edir.
Anar Novruzov Birinci Qarabağ müharibəsi, Aprel və Tovuz döyüşlərində qəhrəmancasına vuruşaraq Vətənin keşiyində durub. Snayper tüfəngi ilə atdığı dəqiq atəşlə onlarca düşmən əsgərini məhv etdiyindən, ona AQS-17 silahının “atası” da deyirdilər. Kəşfiyyatçı zabit kimi xidmətinə görə ona “akula” ləqəbi verilib.
14 iyul 2020-ci ildə Tovuz istiqamətində gedən döyüşlərdə general-mayor Polad Həşimov və bir çox zabit-əsgər heyəti ilə birgə döyüş tapşırığını yerinə yetirən zaman şəhid olub.
Doğulub böyüdüyü Ərkivan qəsəbəsində torpağa tapşırılıb.
