Biləsuvarda gəlini tərəfindən qətlə yetirilmiş ahıl qadınla bağlı bəzi təfərrüatlar açıqlanıb.
Cenublu.az xəbər verir ki, 4 oğlu və 2 qızı olan 72 yaşlı Almaz Cəfərova uzun müddət tənha yaşayıb. Onun oğlanlarının Rusiyada yaşadığı bildirilir. Bir müddət əvvəl isə gəlini Gülbəniz Həsənzadə Rusiyadan gələrək mərhumla eyni evdə yaşamağa başlayıb.
Mərhumun yaxınlarının sözlərinə görə, Almaz Cəfərova tək yaşadığı üçün evə təhlükəsizlik kameraları quraşdırılıb. Hadisədən təxminən 40 gün sonra yaxınları kamera görüntülərinə baxarkən ahıl qadının qətlə yetirildiyini müəyyən ediblər.
Faktla bağlı cinayət işi başlanıb. Mərhumun nəşi ekshumasiya olunub və ölümün dəqiq səbəblərinin müəyyənləşdirilməsi məqsədilə müvafiq ekspertizalar təyin edilib.
Hazırda araşdırmalar davam etdirilir.
