Müəllimlərin tam ştatla - yəni gündə 8 saat məktəbdə qalmaqla işləməsi barədə müzakirələr təhsil sistemində yeni mərhələnin başlandığını göstərir. Təhsil Nazirliyinin açıqlamasına görə, bu sistem ilk növbədə böyük məktəblərdə tətbiq ediləcək və əsasən Bakı, eləcə də bəzi iri rayon məktəblərini əhatə edəcək.
Modern.az-a danışan təhsil tədqiqatçısı Elmin Nuri bildirib ki, 8 saatlıq iş qrafiki daha çox Bakı, Sumqayıt və Abşeron kimi geniş şagird kontingentinə malik məktəblərdə tətbiq oluna bilər. Onun sözlərinə görə, bu mexanizmin işləməsi üçün məktəblərin həm ölçü, həm də texniki-təşkilati baxımdan hazır olması vacibdir.
“Bu məktəblərdə seçilmiş müəllimlər dərs bitən kimi yox, məhz iş saatının sonunda məktəbdən çıxa biləcək. Bu isə əlavə imkanlar tələb edir. Müəllim dərsini qurtardıqdan sonra sabahkı dərsin planını hazırlamalı, mövzular üzərində işləməli, şagirdlərlə fərdi məşğələlər və bəzən valideynlərlə ünsiyyət saatları keçirməlidir. Bəs bunun üçün məktəbdə şərait varmı? Bu, ən böyük problemdir. Ona görə də ilk mərhələdə yalnız pilot məqsədli iri məktəblərin seçilməsi gözləniləndir”, – ekspert bildirib.
Onun sözlərinə görə, Bakıda bu meyarlara cavab verən məktəb sayı kifayətdir. Regional təhsil idarələri üzrə isə hər rayondan ən azı bir mərkəzi məktəbin seçilməsi mümkündür:
“Məsələn, Astara–Lənkəran Regional Təhsil İdarəsinə daxil olan rayonların hər birindən bir böyük məktəb pilot layihəyə qoşula bilər.”
E.Nuri qeyd edib ki, yaxın vaxtlarda 8 saatlıq iş qrafikinin kənd məktəblərində tətbiqi real görünmür:
“Kənd məktəblərində bunun üçün əlavə gözlənti otaqları, fərdi hazırlıq kabinetləri, ən əsası, uyğun infrastruktur yoxdur. Xarici təcrübədə müəllimlər üçün istirahət otaqları, görüş otaqları və s. var. Bizdə bunları tətbiq etmək hələ ki, mümkün deyil. Buna görə də 8 saatlıq qrafik tam qaydası ilə təşkil olunacaqsa, buna cavab verən məktəblərin sayı çox olmayacaq.”
