Şirvan Apellyasiya Məhkəməsində ehtiyatsızlıqdan adam öldürmədə təqsirləndirilən Ümidəli Təhməzovun barəsindəki hökmdən verilən apellyasiya şikayəti üzrə məhkəmə iclası başa çatıb.
İttihama görə, hadisə bu il martın 2-də İmişli rayonunun Yalavac kəndində qeydə alınıb.
Belə ki, hərarəti qalxan 4 yaşlı Nurgül Qarayeva Ümidəli Təhməzovun Qaradonlu kəndindəki evinə gətirilib, tibb müəssisəsindən kənarda hər hansı bir müalicənin aparılmasının, habelə “Seftriaksion” dərman preparatının sınaq qoyulmadan inyeksiya edilməsinin yolverilməz olmasına baxmayaraq, ona antibiotik iynəsi vurub. Vurulan iynədən şoka düşən uşaq bir neçə dəqiqədən sonra ölüb. Faktla bağlı Cinayət Məcəlləsinin ehtiyatsızlıqdan adam öldürmə maddəsi ilə cinayət işi açılıb.
Xatırladaq ki, Ümüdəli Təhməzov 2012-ci ildən 2022-ci ilədək İmişli rayon Qaradonlu kənd xəstəxanasında baş həkim vəzifəsində çalışıb.
İmişli Rayon Məhkəməsinin hökmü ilə Qaradonlu Ailə Sağlamlıq Mərkəzinin bölmə müdiri olmuş 68 yaşlı Ümidəli Təhməzov 2 il müddətinə azadlıqdan məhrum edilib. Bununla yanaşı ona 2 il müddətinə dövlət və özəl tibb müəssisələrində məsul və rəhbər vəzifə tutma qadağan edilib.
Qərara əsasən, apellyasiya şikayəti təmin edilməyib.
Qeyd edək ki, soyad şərtidir.
