Lənkəran rayonunun Boladi kəndində yerləşən uşaq bağçasının binası təhlükəli vəziyyətdədir. Bu haqda məlumatı Cenublu.az bu gün, 7 aprel tarixində ATV-yə istinadən verir.
Belə ki, 85 yaşlı körpələr evi-uşaq bağçası elə vəziyyətdədir ki, oradakı 70 uşaq hər an təhlükə ilə üz-üzədir.
İstismar müddətini çoxdan bitirən bağçanın nəinki çürük taxtadan olan pəncərə və qapıları, daşı belə ovulub tökülür. Körpələrin günü şəraitsiz və qəzalı olan bu iki mərtəbəli bağçada keçir.
Məsələ ilə bağlı Lənkəran-Astara Regional Təhsil İdarəsindən bildirildi ki, bağçanın vəziyyətindən xəbərləri var və problemin həlli ilə bağlı addımlar atılacaq.
“Bağçaya baxış keçirilib, yaxın zamanda Boladi kənd körpələr evi - uşaq bağçası üçün yeni bağça binasının tikintisi nəzərdə tutulub”, - deyə Lənkəran üzrə təhsil sektorunun müdiri Elman Rzayev bidirib.
Qeyd edək ki, körpələr evinin yerləşdiyi bina 1938-ci ildə tikilib istifadəyə verilib və əvvəl kəndin məktəbi kimi fəaliyyət göstərib. 1989-cu ildən isə bağça kimi körpələrin istifadəsinə verilib.
