SON XƏBƏRLƏR

Masallı Vərəm Dispanserinin baş həkimi Mirrəhim Nəbiyev özünün qaçırılaraq girov saxlanıldığı və daha sonra intihara cəhd etdiyi xəbərlərinə aydınlıq gətirib.

Cenublu.az Space TV-yə istinadən məlumat verir ki, verdiyi açıqlamada o, hipoterioz xəstəliyindən əziyyət çəkdiyini bildirib.

“Gündəlik L-troksin dərmanı qəbul edirəm. Endokrinoloq tərəfindən dərman dozası qaldırıldığı üçün, istifadə etdikdən sonra halım pisləşib. Əvvəlcə öz istəyimlə Masallı rayon Mərkəzi Xəstəxanasına müraciət etdim. Orada ilkin yardım aldıqdan sonra Plazmaforez aparatı olmadığı üçün Bakı şəhərinə “Semaşko”ya getdim. Hazırda işdəyəm, səhhətimlə bağlı şikayətim yoxdur”.

O, Nadirov qardaşları tərəfindən sələmə götürdüyü pulu qaytara bilmədiyi üçün qaçırıldığı məsələsinə də aydınlıq gətirib:

“Adıçəkilən şəxslərlə heç bir əlaqəm yoxdur. Haqqımda yazılanlar həqiqəti əks etdirmir. Bu, qərəzli olaraq nüfuzuma xələl yetirmək üçün uydurulan bir hadisədir” – deyə baş həkim əlavə edib.