Masallı Vərəm Dispanserinin baş həkiminin intihara cəhd etdiyi iddia olunur. Bu haqda məlumatı Cenublu.az bu gün, 27 sentyabr tarixində verir.
Belə ki, baş həkim Mirrəhim Nəbiyevin sosial şəbəkələrdə sələmə pul götürdüyü və daha sonra ödəyə bilmədiyi üçün canına qəsd etdiyi bildirilir. Həmçinin qeyd olunur ki, Mirrəhim Nəbiyev borcunu ödəyə bilmədiyinə görə Spartak və Azər Nadirov qardaşları tərəfindən 1 gün girov saxlanılıb və daha sonra keçirdiyi sarsıntıdan damarlarını kəsərək intihara cəhd edib.
Məsələ ilə bağlı DİN-in Mətbuat Xidmətinin Lənkəran regional qrupunun baş inspektoru, polis baş leytenantı Məhəmməd Rzayevlə əlaqə saxladıq.
“Həmin şəxsin dərman zəhərlənməsi diaqnozu ilə xəstəxanaya daxil olması ilə bağlı Masallı Rayon Polis Şöbəsinə məlumat daxil olub. Vəziyyəti ağır olduğundan o, Bakıdakı tibb müəssisələrindən birinə aparılıb. Faktla bağlı Masallı RPŞ-də araşdırma aparılır. Təfərrüatlar həmin şəxsin dindirilməsindən və araşdırma aparıldıqdan sonra məlum olacaq” – deyə DİN-in rəsmisi bildirib.
