Yaqub Əkbər oğlu Məmmədov 18 aprel 1946-cı ildə Masallı rayonunun Ərkivan qəsəbəsində anadan olub [1].
O, 1960-cı ildə Bağlaküçə yeddiillik məktəbini bitirib, Bakı Energetika Texnikumuna qəbul olub. Yaqub Məmmədov 1961-ci ildə “Dinamo” İdman Cəmiyyətində sərbəst güləş üzrə məşqlərə başlayıb. O, 1961-1973-cü illərdə müxtəlif yarışlarda iştirak edərək, bir çox mükafatlara layiq görülüb [1].
Yaqub Məmmədov 1966-cı ildə 19-20 yaşlı gənclər arasında Tbilisi şəhərində keçirilən SSRİ birinciliyində ilk dəfə SSRİ çempionu olub [1,2]. Məmmədov 1966-1972-ci illərdə sərbəst güləş üzrə SSRİ yığma komandasının üzvü olub [1]. O, 1967 və 1970-ci illərdə keçirilən SSRİ çempionatlarında gümüş medallar qazanıb [2].
İdmançı 1970-ci ildə öz yaşıdları arasında Mahaçqala şəhərində keçirilən SSRİ çempionatında beşqat dünya çempionu, Dağıstan pəhləvanı Əli Əliyevə qalib gələrək, ikinci yerə çıxıb [2]. O, ABŞ, Polşa, İran, Əfqanıstan, ümumiyyətlə 60-a yaxın xarici ölkədə keçirilən idman yarışlarında iştirak edib [1,2].
Yaqub Məmmədov 1974-cü ildən başlayaraq məşqçi kimi fəaliyyət göstərib. 1997-2005-ci illərdə Yaqub Məmmədov sərbəst güləş üzrə Azərbaycan yığmasının baş məşqçisi olub [5]. 2006-cı ildə Məmmədov təqaüdə çıxıb [6].
Məşqçi 1984-cü ildə SSRİ məktəblilərinin Ümumittifaq Spartakiadasında Azərbaycan yığma komandasının uğurlu çıxışına görə Respublika Ali Sovetinin Fəxri Fərmanı ilə təltif edilib [1]. Onun tələbələri müxtəlif yaş qrupları üzrə beynəlxalq turnirlərdə, Avropa və dünya çempionatlarında, həmçinin olimpiya oyunlarında 200-dən çox medal qazanıblar [1,3].
Məmmədov 2000-ci ildə XXVII Yay Olimpiya Oyunlarında göstərdiyi yüksək nəticəyə görə “Şöhrət” ordeninə layiq görülüb. O, 1966-cı ildə sərbəst güləş üzrə idman ustası, 1970-ci ildə beynəlxalq dərəcəli idman ustası, 1986-cı ildə Azərbaycan Əməkdar məşqçisi, 2003-сü ildə ilin məşqçisi fəxri adlarına layiq görülüb [1,4].
Azərbaycanın Güləş Federasiyasının İcraiyyə Komitəsinin və Respublika Milli Olimpiya Komitəsinin üzvü seçilib [1].
Ədəbiyyat:
