Yardımlı rayonunun Şıxlar kənd tam orta məktəbində 10-cu sinfin bağlanması ilə bağlı yeni məlumatlar üzə çıxıb.
Teleqraf.com xəbər verir ki, məktəbdə sinfin fəaliyyətə başlaması üçün tələb olunan minimum şagird sayı təmin olunmadığına görə 10-cu sinif ləğv edilib. Nəticədə dörd şagird – Kamilov Rihad Əlif oğlu, Əsgərli Mikayıl Nəsib oğlu, Rəfili İsmayıl Möhübbət oğlu və Yaqubova Rəqsanə Fərasim qızı dərsdən kənarda qalıb.
Valideynlər bildirirlər ki, məsələ barədə onlara əvvəlcədən məlumat verilməyib. Ən ciddi narazılıq doğuran məqam isə həmin şagirdlərin adlarının Rayon Təhsil Sektoru tərəfindən Məktəbin Ümumi Təhsil İnformasiya Sistemi (UTİS) üzərindən xəbərsiz şəkildə silinməsi olub. Bu səbəbdən onların başqa məktəblərə yerdəyişməsi texniki cəhətdən mümkünsüz vəziyyətə düşüb.
Təhsil ekspertlərinin sözlərinə görə, siniflərin bağlanması hallarında həmin şagirdlər dərhal yaxınlıqdakı məktəblərə yerləşdirilməlidir. Şagirdin UTİS sistemindən çıxarılması isə yalnız aşağıdakı hallarda mümkündür:
şagirdin və ya valideynin arzusu ilə məktəb dəyişdikdə;
təhsil səviyyəsini başa vurduqda (məsələn, 11-ci sinfi bitirdikdə);
davamlı intizam pozuntuları səbəbindən pedaqoji şura qərarı ilə;
və ya qanunla müəyyən edilmiş digər hallarda.
Göründüyü kimi, bu halların heç biri baş vermədiyi təqdirdə şagirdlərin adlarının sistemdən çıxarılması qanunsuz hesab olunur.
Kənd sakinlərinin sözlərinə görə, qərar verilərkən yalnız məktəb direktoru ilə danışıqlar aparılıb, valideynlərin fikri isə nəzərə alınmayıb. Onlar dəfələrlə Lənkəran–Astara Regional Təhsil İdarəsinə müraciət etsələr də, məsələ hələ də həllini tapmayıb.
