Yaponiya səfirliyi Niiqata prefekturasının Sanco şəhərində 300 ildən çox tarixə malik “Sanco çərpələng yarışı”nı Lənkəranda keçirib. Bu haqda məlumatı Cenublu.az bu gün, 25 iyul tarixində Azertac-a istinadən verir.
Bu yarış həm çərpələng uçurmaq texnikasını, həm də Yaponiya mədəniyyətini, ənənələrini tərənnüm edir. Yaponiyadan məhz bu tədbir üçün gəlmiş sənətkarlar yarış üçün istifadə olunan məşhur altıbucaqlı çərpələnglərini havaya uçurublar. Məqsəd Yaponiyanın ənənəvi çərpələnglərini küləklə səmanın yüksəkliyində uçurdaraq, Azərbaycan xalqının Yaponiya mədəniyyətini yaxından tanımaq imkanı yaratmaqla, Yaponiyaya marağın artması və biliklərin dərinləşməsinə nail olmaqdır.
Lənkərandakı tədbir sakinlərin, ailələrin, xüsusilə uşaqların diqqətini çəkib və böyük marağa səbəb olub. “Biz onlarla xoş vaxt keçirdiyimiz üçün məmnunuq. Bakı və Lənkəran sakinləri Yaponiya mədəniyyəti ilə yaxından tanış oldular. Budəfəki yarışlar ancaq Azərbaycanın iki şəhərində keçirilib. İstərdik ki, gələcəkdə bu tədbirlər Azərbaycanın digər bölgələrində təşkil olunsun. Yarış Yaponiya ilə Azərbaycan arasında diplomatik münasibətlərin qurulmasının otuzuncu ildönümü çərçivəsində baş tutan tədbirlərdən biridir”, - deyə Yaponiyanın Azərbaycandakı səfirinin müavini, müşavir Takoya Yukihito vurğulayıb.
Qeyd edək ki, tədbir Lənkranla yanaşı, Bakı şəhərində də keçirilib.
