Haşım Kələntərli (1899–1984) Azərbaycanın görkəmli muğam və xalq mahnıları ifaçısı, milli vokal sənətinin parlaq nümayəndələrindən biri olub.
Haşım Səməd oğlu Kələntərli 1899-cu ildə Lənkəran şəhərində dünyaya göz açıb. Erkən yaşlarında valideynlərini itirən Haşım və bacıları ağır həyat şəraiti ilə üzləşiblər. Orta məktəbi Lənkəranda bitirdikdən sonra bacıları ilə birgə Bakıya köçüb. O, 1924–1933-cü illərdə Azərbaycan Opera və Balet Teatrında, 1933–1949-cu illərdə Azərbaycan Dövlət Dram Teatrında aktyor-müğənni kimi fəaliyyət göstərib. 1949–1953-cü illərdə isə Azərbaycan Dövlət Filarmoniyasının solisti olub. 1943-cü ildə ona Əməkdar Artist fəxri adı verilib .
Haşım Kələntərli muğam və xalq mahnılarının mahir ifaçısı kimi tanınıb. Xüsusilə "Segah" muğamını “sol” tonallıqda oxuması ilə fərqlənib və bu ifa tərzi musiqi ədəbiyyatında "Haşım segahı" kimi tanınıb. O, həmçinin "Şur-Şahnaz", "Qatar" muğamları və Lənkəran-talış el havalarını yüksək sənətkarlıqla ifa edib. Təəssüf ki, onun ifalarının çoxu qrammofon valına yazılmayıb və bu qiymətli sənət inciləri günümüzə çatmayıb .
Haşım Kələntərli bacısı, tanınmış aktrisa Münəvvər Kələntərli ilə birgə 1930-cu illərdə Azərbaycan radiosunun efirində səslənən bir çox konsert proqramında iştirak edib. Onların repertuarında "Aman, nənə", "Kəşmiri şal", "Lolo" kimi Lənkəran bölgəsinə aid el nəğmələri yer alıb.
Haşım Kələntərlinin ifası dinləyicilər tərəfindən yüksək qiymətləndirilib. Onun muğamları aydın və düzgün tərzdə çatdırılması, Məhəmməd Füzuli və Hüseyn Cavid poeziyasına olan vurğunluğu ilə seçilib. Azərbaycan MEA-nın müxbir üzvü, filologiya elmləri doktoru Əziz Mirəhmədov onun ifasına yüksək qiymət verərək xatirələrində yazıb: "30-cu illərdə radioda səslənən konsertlərdə xanəndələrdən Xan Şuşinskinin, bir də Haşım Kələntərlinin ifası mənə daha çox xoş gələrdi. Xüsusən, “Segah” muğamının o illər ən yaxşı ifaçısı Haşım Kələntərli idi" .
Haşım Kələntərli 24 may 1984-cü ildə Bakıda vəfat edib. Onun sənət irsi Azərbaycan musiqi mədəniyyətində əhəmiyyətli yer tutur və xatirəsi daim hörmətlə yad edilir.
