Aktyor Cavidan Novruz Biləsuvardan olan mərhum Xalq artisti, atası Ramiz Novruzun ən böyük arzusunu gerçəkləşdirib.
Cenublu.az xəbər verir ki, bu haqda aktyor "Günə bax" verilişində danışıb. O bildirib ki, atası üçün çəkilən filmdə heç kimdən dəstək almayıb:
"Atamın ən böyük arzusu idi filmi çəkilsin. Heç bir quruma ağız açmadan, nəsə tələb etmədən, hər bir tərəfi, maddiyatı da özüm etdim. Yubileyinin keçirilməsini də özüm etdim. Sabah heç kim deməsin yardım etmişik. İyunun 9-da atamın yubiley gecəsi olacaq və film orada göstəriləcək".
C.Novruz ekran işindəki məktəb səhnəsi ilə bağlı qalmaqaldan da danışıb:
"Filmdə bir səhnə var idi: uşaq aktyor olmaq istəyir, bir gün müəllim hamıdan soruşur, böyüyəndə nə olmaq istəyirsən? Uşaq tənəffüsdə gəlib deyir ki, müəllim, mən aktyor olmaq istəyirəm, utandım deməyə. Bakıda bu səhnəni çəkməyə qoymadılar. Nə problem baş verir ki, bu, qadağan edilib? Rayonda əmim məktəbdə işləyir, sonda ona dedim ki, gəlim çəkim. Amma Elm və Təhsil Nazirliyi sonda buna şərait yaratdı".
