Yardımlı rayonu ərazisindən keçən Viləş çayında müşahidə olunan ekoloji vəziyyət bir sıra suallar doğurur.
Cenublu.az məlumat verir ki, çayın ətrafı və məcrası müxtəlif məişət tullantıları ilə çirkləndirilib, həmçinin sudan qeyri-qanuni istifadə halları da müşahidə olunur.
Plastik butulkalar, sellofan torbalar və digər tullantıların çay axarına və yaxın ərazilərə yayılması ekoloji tarazlığa təsir etməklə yanaşı, suyun keyfiyyətinə də mənfi təsir göstərir. Bu vəziyyətin uzunmüddətli nəticələri torpaq örtüyünə, canlı aləmə və insanların sağlamlığına zərər verə bilər.
Müşahidə zamanı qeydə alınan digər bir nəticə isə çaydan icazəsiz su götürülməsi ilə bağlıdır. Elektrik enerjisi ilə işləyən nasos vasitəsilə çayın içərisindən suyun çəkilməsi faktı qeyri-qanuni su istifadəsinə dair ehtimalları gündəmə gətirir. Bu cür hallar həm enerji istifadəsi, həm də su ehtiyatlarının idarə olunması baxımından müvafiq qurumların diqqətini tələb edir.
Qeyd edək ki, Viləş çayı region üçün önəmli su mənbəyidir və onun mühafizəsi ümumi ekoloji təhlükəsizliyin təminində mühüm rol oynayır.
