Bu gün Vətən müharibəsi şəhidlərindən – Nurlan Fərəməzov, Elmar Mirzəyev və Sənan Ağazadənin doğum günləridir.
🥀Sənan Nizami oğlu Ağazadə 2000-ci ildə Lənkəran rayonun Göyşaban kəndində anadan olub. 2019-cu ildə hərbi xidmətə yollanan Sənan "Mən əfsanə olacağam!" deyirmiş.
Sənan Ağazadə Vətən müharibəsi zamanı Füzulinin azadlığı uğrunda gedən döyüşlərdə minaatan bölüyündə tuşlayıçı kimi savaşıb. Hədəfi sərrast nişan alması sayəsində düşmənin bir neçə hərbi texnikasını və 35 əsgərini məhv edib.
Oktyabrın 14-də qəhrəmancasına şəhid olub.
O, Vətən uğrunda", "İgidliyə görə" və "Füzulinin azad olunmasına görə" medalları ilə təltif edilib.
🥀Elmar Şahin oğlu Mirzəyev 1995-ci ildə Biləsuvar rayonunun Ağalıkənd kəndində dünyaya göz açıb.
Baş leytenant Elmar Mirzəyev Vətən müharibəsi zamanı Murovdağ döyüşlərində, həmçinin Füzulinin və Xocavəndin azadlığı uğrunda gedən döyüşlərdə savaşıb. Elmar Mirzəyev oktyabrın 15-də Füzuli döyüşləri zamanı şəhid olub və növbəti gün Biləsuvar rayonunda dəfn olunub.
Ölümündən sonra "Vətən uğrunda", "İgidliyə görə", "Kəlbəcərin azad olunmasına görə", "Xocavəndin azad olunmasına görə", "Cəbrayılın azad olunmasına görə" medalları və "Azərbaycan Bayrağı" ordeni ilə təltif edilib.
🥀Nurlan Əhliman oğlu Fərəməzov 1992-ci il mayın 1-də Astara rayonunun Təngərüd kəndində anadan olub.
Azərbaycan Ordusunun tibb xidməti baş leytenantı Nurlan Fərəməzov Vətən müharibəsi zamanı gedən döyüşlərdə yaralı hərbçiləri döyüş meydanından çıxararkən 2020-ci il oktyabrın 9-da şəhid olub. Şəhidimiz oktyabrın 10-da doğulduğu kənddə torpağa tapşırılıb.
O, ölümündən sonra "Vətən uğrunda", "İgidliyə görə", "Füzulinin azad olunmasına görə", "Cəbrayılın azad olunmasına görə" medalları ilə təltif edilib.
