Bu gün cəlilabadlı şəhidimiz – Rəfail İşiyevin anadan olduğu gündür.
Rəfail Əhmədağa oğlu İşiyev 1979-cu il sentyabrın 4-də Cəlilabad rayonunda dünyaya gəlib.
O, ömrünün 16 ilini orduda keçirib. Rəfail PDM mütəxəssisi idi. 2016-cı ilin Aprel döyüşlərində də iştirak etmişdi. Vətən müharibəsində Cəbrayıl rayonunun işğaldan azad edilməsi uğrunda gedən döyüşlərdə iştirak edib. O, yaralı döyüş yoldaşının PDM-ini idarə edərək Cəbrayıl, Füzuli istiqamətində gedən döyüşlərdə düşmənə ağır zərbələr vurmuşdu. Onun son döyüşü Xocavənd istiqamətində olub. Təcrübəli mütəxəssis 2020-ci il noyabrın 3-də Xocavənd istiqamətində gedən döyüşlərdə şəhidlik zirvəsinə ucalıb.
Ölümündən sonra "Vətən uğrunda", "Şuşanın azad olunmasına görə”, "Xocavəndin azad olunmasına görə”, "İgidliyə görə", "Füzulinin azad olunmasına görə" və “Cəbrayılın azad olunmasına görə" medalları ilə təltif edilib.
