Lənkəranın Göyşaban kəndində gecə saatlarında tullantıların yandırılması problemi hələ də həllini tapmayıb.
Cenublu.az-a daxil olan şikayətdə bildirilir ki, gecələr zibillər yandırılır, nəticədə ərazidə göyə bülənd olan tüstü və kəskin qoxu nəinki nəfəs almağı çətinləşdirir.: “Lənkərandan gətirilən tullantılar burada yandırılır və yaranan qoxu yaşayış ərazilərinə yayılır. Qoxudan dayanmaq, dözmək olmur. Pəncərələri belə aça bilmirik.”
Həmçinin bildirilir ki, bu vəziyyət avtomobil yollarında qəza riskini artırır.
“Az qala bu axşam tüstüdən qəza edirdim. Duman o qədər sıxdır ki, yolu görmək olmur. Bəs belə halda qəza olsa, buna kim cavabdehdir?” - sakinlərdən biri deyib.
Şikayətçilər əlavə edirlər ki, sahibsiz küçə itləri də məhz bu zibillərin atıldığı ərazidə toplaşır, bu da insanların təhlükəsizliyinə daha bir təhdiddir.
Göyşaban kənd sakinləri aidiyyəti qurumlardan məsələ ilə bağlı tədbir görülməsini, tullantıların idarə olunmasında qanuni və ekoloji normalara əməl edilməsini tələb edirlər.
