Azərbaycan Muay Tay Federasiyasının prezidenti, 9 qat dünya çempionu Araz Musayevin səhhətində son durumuna aydınlıq gəlib.
Bu barədə İdman.biz-ə kişilərdən ibarət muay tay üzrə milli komandanın böyük məşqçisi Şəhriyar İsayev məlumat verib.
O bildirib ki, hazırda Araz Musayevin durumu qənaətbəxşdir: “Hadisənin detalları haqqında məlumat verə bilmərəm. Ancaq Türkiyəyə komanda olaraq birlikdə gəlmişik. Həkimlərlə, xəstəxana ilə daimi əlaqədəyik. Hazırda səhhəti yaxşıdır, yaddaşı yerindədir. Hər şey qaydasındadır”.
Qeyd edək ki, Türkiyənin Antalya bölgəsində baş verən hadisədə Araz Musayev kürək nahiyəsindən bıçaqlanıb. O, təcili xəstəxanaya çatdırılaraq əməliyyat olunub. Musayev Antalyada Kəmər Dövlət Xəstəxanasına yerləşdirilib.
