Azərbaycanın Tehrandakı səfirliyinə hücum edən şəxs edam olunub.
Cenublu.az İranın “ISNA” xəbər agentliyinə istinadən məlumat verir ki, Azərbaycanın Tehrandakı səfirliyinə hücum edən İran vətəndaşı Yasin Hüseynzadənin edam cəzası bu gün səhər saatlarında icra edilib.
Ötən ay İranın Məhkəmə-Ədliyyə sisteminin sözçüsü Əsgər Cahangir Azərbaycanın Tehrandakı səfirliyinə hücumu törədənin şəxslə bağlı hökm barədə sualı cavablandırarkən yekun hökmün olduğunu bildirib.
Xatırladaq ki, hadisə 27 yanvar 2023-cü ildə Bakı vaxtı ilə səhər saat 8:30-da baş verib. Yasin Hüseynzadə “Kalaşnikov” markalı avtomat silahla mühafizə postunu yararaq mühafizə xidmətinin rəisi əslən Gəncədən olan Orxan Əsgərovu qətlə yetirib. Səfirliyin mühafizə xidmətinin əməkdaşları Vasif Tağıyev və Mahir İmanov hücumun qarşısını alarkən yaralanıblar.
Qeyd edək ki, Orxan Rizvan oğlu Əsgərov 1982-ci ilin 5 noyabr tarixində Gəncədə dünyaya gəlib. Baş leytenant O.Əsgərov Azərbaycan Respublikasının İran İslam Respublikasındakı Səfirliyinin Mühafizə Xidmətinin rəisi vəzifəsində çalışıb.
Hadisənin baş verdiyi gün şəhid elan edilən Orxan Əsgərov 3 fevral 2023-cü ildə Azərbaycan Respublikası Prezidentinin sərəncamı ilə ölümündən sonra “Vətən uğrunda” medalı ilə təltif edilib.
