Təhsil tələbə kreditlərindən ölkənin bütün iqtisadi rayonları üzrə tələbələr yararlanır. Ümumi göstəricilərə əsasən, ən çox kreditdən yararlanma Bakı iqtisadi rayonu üzrə qeydə alınıb.
Bu barədə modern.az-a Təhsil Tələbə Kredit Fondu məlumat verib.
Bildirilib ki, sözügedən iqtisadi rayon üzrə indiyədək 16 mindən çox təhsil tələbə krediti müqaviləsi rəsmiləşdirilib.
Fonddan verilən məlumata görə, bölgələr üzrə təhlil göstərir ki, Bakının ardınca ən yüksək yararlanma göstəricisi Lənkəran–Astara iqtisadi rayonu üzrədir.
“Bu iqtisadi rayondan olan tələbələr tərəfindən 8 minə yaxın kredit müqaviləsi rəsmiləşdirilib. Növbəti ən yüksək göstəricilər isə Gəncə–Daşkəsən və Mərkəzi Aran iqtisadi rayonlarına məxsusdur. Hər iki rayonda 5 mindən çox təhsil tələbə krediti rəsmiləşdirilib”, – məlumatda qeyd olunur.
Bildirək ki, bu müddət ərzində Fondun elektron portalına 84 mindən çox müraciət daxil olub, onlardan 68 mindən çoxu üzrə təhsil tələbə krediti müqaviləsi rəsmiləşdirilib.
