Lənkəran‑Astara Regional Təhsil İdarəsinin tabeliyində fəaliyyət göstərən ümumtəhsil müəssisələrində vakant olan tədris‑təlim‑tərbiyə işləri üzrə direktor müavini və məktəbdənkənar və sinifdənxaric tərbiyə işi üzrə təşkilatçı vəzifələrinə işə qəbul müsabiqəsi çərçivəsində test imtahanı keçiriləcək.
Cenublu.az xəbər verir ki, imtahanda iştirak edən namizədlərə ümumilikdə 60 test tapşırığı təqdim olunacaq. Bu tapşırıqlardan:
- 30-u təhsil qanunvericiliyi və idarəetmə,
- 20-si pedaqogika və tədris metodikası,
- 10-u isə informasiya-kommunikasiya texnologiyaları (İKT) bacarıqları istiqamətlərini əhatə edəcək. Təqdim olunan test tapşırıqları SİM platformasında keçirilmiş mövzuların məzmunu əsasında hazırlanıb.
İmtahanın müddəti 120 dəqiqədir. Namizədlər imtahan binasına saat 09:00-dan gec olmayaraq yaxınlaşmalı və şəxsiyyət vəsiqələrini təqdim etməlidirlər.
İmtahan Lənkəran şəhəri Azər Məhərrəmov adına 7 nömrəli tam orta ümumtəhsil məktəbində (Lənkəran şəhəri, Anar Mahmudov küçəsi 1) təşkil olunacaq.
Qeyd edək ki, test imtahanı kompüter vasitəsilə keçiriləcək və imtahana yalnız 2024-cü ilin noyabr–2025-ci ilin mart ayları ərzində SİM platformasında keçirilən təlimlərdə iştirak etmiş və müvafiq sertifikat əldə etmiş namizədlər cəlb olunacaqlar.
