Azərbaycanın Lerik rayonunun Soru kəndindən olan Səlim Abbasovun rəsmləri Oslodakı nüfuzlu Beynəlxalq Uşaq İncəsənət Muzeyində sərgilənir.
Muzeyin direktoru Angela Qolden leriklinin rəsm əsərlərinə heyran olduğunu bildirib. Dörd yaşında ailəsi Norveçə köçən S.Abbasov media.az-a müsahibə verib.
Həmin müsahibəni təqdim edirik:
– Səlim, ailənizin Lerikdən Norveçə köçməsinin səbəbi nə idi?
– Atam İdrak Abbasov jurnalistdir, anam isə Norveçin uşaq hüquqları xidməti olan Barnevernetdə çalışır. Azərbaycanda müəyyən çətinliklərimiz oldu. Atam beynəlxalq layihədə qalib gəldi və bu, Norveçə mühacirət etməyimizə imkan yaratdı. O vaxt cəmi 4 yaşım var idi.
– Norveçdə uyğunlaşma prosesi necə keçdi?
– Mənim üçün asan oldu. Uşaq bağçasına getdim, Norveç dilini tez öyrəndim. Orada və məktəbdə dostlar qazandım. Amma valideynlərim üçün daha çətin idi – işləməli, dil öyrənməli və yeni mühitə uyğunlaşmalı idilər. Qısa müddət ərzində hər ikisi iş tapdı və ailəmiz üçün sabitlik yarandı.
– Norveçlə Azərbaycan arasındakı fərqlər sənə necə təsir edir?
– Ən böyük fərq ailə münasibətlərindədir. Azərbaycanda qohumluq daha sıx və mehribandır. Norveçdə isə hər şey planlı şəkildə həyata keçirilir – hətta bir ziyarət üçün belə əvvəlcədən razılaşmaq lazımdır. Amma hər iki ölkənin öz gözəlliyi var. Azərbaycanda ruhum dincəlir, Norveç isə mənim ikinci evimdir.
– Yaradıcılığa necə başladın?
– Uşaq vaxtı futbol, üzgüçülük və rəsmə maraq göstərirdim. Zamanla dərslərə və rəsmə daha çox diqqət yetirməyə başladım. Xüsusilə 44 günlük Vətən Müharibəsindən sonra Qarabağla bağlı rəsmlər çəkməyə və kitablar yazmağa başladım.
– Kitab? Deməli, yazıçısan da?
– Bəli (gülür). İlk kitabımı Qarabağa həsr etmişəm, həmin kitabı 11 yaşımda yazmışam, ingilis və Norveç dillərində çap olundu. Məqsədim Azərbaycanla bağlı həqiqətləri çatdırmaq idi. Kitabı Norveç kralına və prezident İlham Əliyevə göndərdim. Ümumilikdə 3 kitabım var.
– Sənət əsərlərin necə təqdim olunub?
– “Xarı Bülbül” adlı rəsmlərim Oslodakı Beynəlxalq Uşaq İncəsənət Muzeyində sərgilənir. Bu sərginin təşkilində Norveçdəki Azərbaycan diasporunun böyük rolu olub. Hazırda yeni əsərlər üzərində işləyirəm.
– Gələcək planların nələrdir?
– Yaydan sonra Beynəlxalq Bakalavr (IB) Liseyində təhsil alacağam. Sonra isə beynəlxalq diplomatiya üzrə ali təhsil almağı planlaşdırıram. İnanıram ki, yaxşı diplomatlar münaqişələri sülh yolu ilə həll edə bilər. Mən də bu yolda olmaq istəyirəm.
