Lerik rayonunun Barzavu kəndində içməli su problemi artıq insanları doğma yurdlarını tərk etməyə məcbur edir.
Teleqraf.az xəbər verir ki, kənd sakinləri uzun illərdir içməli su çatışmazlığından əziyyət çəkirlər. Ən yaxın su mənbəyinə çatmaq üçün hər gün kilometrlərlə yol qət edilir. Yayda bulaqların quruması, qışda isə yolların çətin keçilməsi vəziyyəti dözülməz hala gətirir.
Sakinlər deyirlər ki, bəzi ailələr qışda qarı əridib su kimi istifadə edirlər. Əkin-biçin su olmadığı üçün mümkünsüzdür. Həyatlarını davam etdirmək üçün bəziləri suyu pulla almağa məcbur qalıb.
Kənd sakini Rahim Cabbarov bildirir ki, bir maşın su 80 manata başa gəlir:
“Gətirdikləri 3 ton su bir ailəyə bir ay çatmır. Yeməyə də lazımdır, təmizlik, heyvan saxlamaq üçün də – hər şey su ilə bağlıdır.”
Maddi və fiziki baxımdan getdikcə ağırlaşan vəziyyət bəzi ailələri kəndi birdəfəlik tərk etməyə məcbur edib.
Xatırladaq ki, Azərbaycanın ən uzunömürlü insanı -168 il ömür sürmüş Şirəli Müslümov 1805-ci ildə bu kənddə anadan olub.
