Bu gün şəhid polkovnik Rahim Əhməd oğlu Əliyevin doğum günüdür.
Rahim Əliyev 18 oktyabr 1967-ci ildə Lənkəran şəhərində anadan olub. Cəmşid Naxçıvanski adına Hərbi Liseyi bitirdikdən sonra təhsilini Ukrayna Ali Hərbi Akademiyasında davam etdirib. Akademiyanı müvəffəqiyyətlə başa vurduqdan sonra bir müddət Almaniyada da hərbi təhsil alıb.
Birinci Qarabağ müharibəsi zamanı könüllü şəkildə ordu sıralarına qoşulan Rahim Əliyev Ağdamın Cəvahir kəndində istehkamçılar üçün təlim mərkəzi yaradıb. Uzun illər Azərbaycan Silahlı Qüvvələrinin tərkibində xidmət edib. O, Azərbaycanın ilk mühəndis-istehkamçılarından biri kimi tanınır.
1992-ci ildə Fred Asifin yaratdığı 859 saylı hərbi hissənin tərkibində erməni işğalçılarına qarşı döyüşlərdə iştirak edib. Ağdərədən tutmuş Füzuliyə qədər bir sıra mühüm hərbi əməliyyatlarda iştirak edən Rahim Əliyev Azərbaycanın ordu quruculuğunda mühüm rol oynayıb.
2016-cı ilin Aprel döyüşlərində Lələtəpə yüksəkliyinin azad olunmasında xüsusi şücaət göstərib. Həmin döyüşlərdəki xidmətlərinə görə Prezident İlham Əliyevin sərəncamı ilə “Vətən uğrunda” və “İgidliyə görə” medalları ilə təltif olunub.
Polkovnik Rahim Əliyev 20 yanvar 2018-ci ildə döyüş tapşırığını yerinə yetirərkən, ordumuz tərəfindən sınaqdan keçirilən yeni qurğuların tətbiq olunduğu ərazidə silah yoldaşlarını qorumaq məqsədilə özünü sipər edərək minaya düşüb və şəhid olub.
O, Bakıda yerləşən “Qurd Qapısı” hərbi qəbiristanlığında dəfn edilib.
