Bu gün Vətən Müharibəsi Qəhrəmanı, şəhid mayor Amid Heydərovun anım günüdür.
Azərbaycan Silahlı Qüvvələrinin mayoru Amid Heydərov 1988-ci il mayın 20-də Lerik şəhərində anadan olub.
32 yaşında hərbi hissə komandiri olan Amid Heydərov Vətən müharibəsi zamanı hücum əmri veriləndə tankı ilə birgə düşmənin müdafiə xəttini yaran ilk cəsur döyüşçülərimizdən biri olub. Füzuli istiqamətində gedən döyüşlərdə qəhrəman mayor öz heyəti ilə yüksəklikləri atəşə tutaraq düşmənə mövqe əldə etməyə imkan verməyib, son mərmisinədək, son nəfəsinədək rəşadətlə vuruşub.
O, Cəbrayılın azadlığı uğrunda gedən döyüşlərdə iştirak edib və oktyabrın 3-də bu istiqamətdə baş verən döyüşlər zamanı qəhrəmancasına şəhid olub.
Amid Heydərov orduda göstərdiyi xidmətlərə görə “Azərbaycan Silahlı Qüvvələrinin 90 illiyi” yubiley medalı, “Azərbaycan Silahlı Qüvvələrinin 95 illiyi” yubiley medalı və “Qüsursuz xidmətə görə” 3-cü dərəcəli medalı ilə təltif edilib. Ölümündən sonra ona “Vətən Müharibəsi Qəhrəmanı” adı verilib, həmçinin “Vətən uğrunda” və “Cəbrayılın azad olunmasına görə” medalları ilə təltif olunub.
