Sabirabadda vəzifəli şəxslərin pul müqabilində saxta əlillik dərəcəsi verməsi ilə bağlı cinayət işi başa çatıb və məhkəməyə göndərilib.
Baş Prokurorluqdan verilən məlumata görə, Sabirabad Rayon Mərkəzi Xəstəxanasının Poliklinika şöbəsinin sabiq müdiri və Həkim Məsləhət Komissiyasının üzvü Əlişir Əliyev, eləcə də Qabil Quliyev və İntiqam Kərimov öz aralarında cinayət əlaqəsinə girərək tibbi müayinədən keçirilməyən, heç bir xəstəlikdən əziyyət çəkməyən şəxslərə rüşvət qarşılığında əlillik dərəcəsi təyin ediblər.
İstintaq müəyyən edib ki, onlar TƏBİB-in “e-Tabib” sisteminə bilərəkdən yalan diaqnozlar daxil edərək Dövlət Tibbi-Sosial Ekspertiza və Reabilitasiya Agentliyinə göndəriblər.
Təqsirləndirilən şəxslərə Cinayət Məcəlləsinin rüşvət alma, vəzifə səlahiyyətlərindən sui-istifadə və vəzifə saxtakarlığı maddələri ilə ittiham elan olunub. Onların səhhəti və yaşı nəzərə alınaraq polis nəzarəti tədbiri seçilib.
Cinayət işi Bakı Ağır Cinayətlər Məhkəməsinə göndərilib.
