Sabirabadda fəaliyyət göstərən “İZ” ailəvi restoranında iki tovuzquşu, üç qırqovul və 15 göyərçinin baytar nəzarəti olmadan qapalı məkanda saxlanıldığı müəyyən edilib.
Bu barədə Cenublu.az -a Azərbaycan Qida Təhlükəsizliyi Agentliyindən (AQTA) məlumat verilib.
Bildirilib ki, restoran sahibinə quşların xüsusi mühafizə olunan təbiət ərazilərinə və ya heyvan rifahı tələblərinə cavab verən heyvan parklarına təhvil verilməsi, saxlanma yerlərində təmizlənmə, dezinfeksiya və digər baytarlıq-sanitariya tədbirlərinin həyata keçirilməsi barədə tapşırıqlar verilib. Tapşırıqlara əməl olunmadığı təqdirdə qanunvericiliyə uyğun tədbirlərin görüləcəyi bildirilib.
Qeyd edək ki, vəhşi heyvan və quşların ictimai iaşə müəssisələrində və ailəvi istirahət məkanlarında saxlanılması və nümayiş etdirilməsi qanunla qadağandır. Belə hallar heyvan və quşların insanlarla təmasda olması nəticəsində zoonoz xəstəliklərin yayılması və bioloji təhlükəsizliyin pozulması risklərini artırır.
