Xəbər verdiyimiz kimi, ötən günlərdə Sabirabadda 17 yaşlı qızla 35 yaşlı Orxan Mehbalıyevin qız toyu mərasimi baş tutub.
Bizim.mediа məlumat verir ki, gəlin rayonun Türkədi kəndində yaşayır. Bəy isə Yolçubəyli kənd sakinidir.
Bəyin qohumu bildirib ki, oğlan toyu 23 oktyabrda Yolçubəyli kəndində keçiriləcək. Onun sözlərinə görə, bəyin ailəsi imkanlı olduğuna görə qız tərəf bu nikaha razılıq verib. Artıq cehizlər oğlan evinə daşınıb və toy tədarükünə başlanılıb.
Bildirilib ki, oğlan toyunun gizli keçirilməsi planlaşdırılır və gəlin iki gün öncədən bəy evinə aparılacaq.
Qızın ailəsi ilə əlaqə saxladıqda isə ata bildirib ki, qızı öz təkidi ilə ərə getmək istəyir. O, “oğlan xərc çəkib deyə həmin pulu çıxarmaq üçün özünə toy edəcək. Mən ona necə qarışım?” – deyə qeyd edib.
Amma qızın anası daha sərt reaksiya verib. O, “xoşum gəlib, vermişəm, əcəb eləmişəm. Çox adam toy edir, amma bizə ilişirlər. Belə vermişəm, əcəb eləmişəm,” – deyə açıqlama verib.
Qeyd edək ki, məsələ ilə bağlı Daxili İşlər Nazirliyinə sorğu göndərilib.
