Pyotr İlyiç Çaykovski adına Böyük Simfonik Orkestrin musiqiçiləri Azərbaycan sərhədini keçiblər.
Cenublu.az xəbər verir ki, hazırda Rusiya Federasiyasının tanınmış kollektivlərindən biri – Pyotr İlyiç Çaykovski adına Böyük Simfonik Orkestrin musiqiçiləri İranla İsrail arasında baş verən son gərginlik fonunda İslam Respublikasında yaranan təhlükəsizlik riski səbəbindən təxliyə olunan xarici vətəndaşlar arasında yer alıblar. Onlar İran ərazisində baş tutmalı olan bir sıra mədəni tədbirlərdə iştirak etmək məqsədilə bu ölkəyə səfər etmişdilər. Lakin bölgədəki son hadisələr səbəbindən tədbirlər təxirə salınıb və musiqiçilərin təhlükəsiz şəkildə ölkədən çıxarılması qərara alınıb.
Çaykovski adına orkestrin üzvləri Astara sərhəd buraxılış məntəqəsindən Azərbaycana daxil olublar. Hazırda onlar Azərbaycan ərazisində müvəqqəti olaraq yerləşdirilir və Rusiya Federasiyasına dönüşləri üçün logistik tədbirlər həyata keçirilir.
Məlumata görə, musiqiçilər arasında tanınmış dirijorlar, skripkaçılar və digər simfonik musiqi ifaçıları da var. Onların səhhətində hər hansı bir problem qeydə alınmayıb. Məsələ Rusiya və Azərbaycanın müvafiq qurumları arasında koordinasiyalı şəkildə həll olunur.
Qeyd edək ki, Çaykovski adına Böyük Simfonik Orkestr dünya miqyasında tanınan və zəngin musiqi ənənələrinə malik kollektivdir. İfaçıların Azərbaycan ərazisindən keçərək təhlükəsiz zonaya çatdırılması regional əməkdaşlığın və humanitar dəstəyin nümunəsi kimi qiymətləndirilir.
