Son 10 gündür gündəmdən düşməyən Lənkəran şəhər İcra Hakimiyyəti başçısının keçmiş müavini Rəsilə Əliyeva barəsində daha bir iddia ortaya çıxıb. Bu haqda məlumatı Cenublu.az bu gün, 25 iyul tarixində Bizim.media-ya istinadən verir.
Belə ki, Qida Təhlükəsizliyi Agentliyinin Lənkəran regional bölməsinin əməkdaşı Elşən Məlikov Əliyeva haqda bunları deyib: “Mən Lənkəran-Astara Regional Məşğulluq filialında fəhlə kimi çalışırdım. 2020-ci ildə Rasilə Əliyeva məni yanına çağırıb tələb etdi ki, Lənkəran-Astara Regional Məşğulluq Filialında baş verən hər şey barədə onu məlumatlandırım. İmtina etdim. 3 min manat təklif etdi, yenə də razılaşmayıb getdim. Həmin ilin mart ayı idi. Rasilə Əliyeva yenidən məni yanına çağırdı və xidməti otağında fiziki təzyiqlər göstərdi. Lənkəran-Astara Regional Məşğulluq filialının rəhbəri Ramin Nəcəfov, Lənkəran Şəhər İcra Hakimiyyətinin Hüquq şöbəsinin müdiri Emin Quliyev, Lənkəran Şəhər Yaşıllaşdırma Müəssisəsinin rəhbəri Polad İmaməliyev, İcra Hakimiyyətinin Ərazi idarəetmə və yerli özünüidarəetmə orqanları ilə iş şöbəsinin baş məsləhətçisi Günəş Quluzadə və adlarını unutduğum bir neçə şəxsin gözünün qarşısında məni şillə-təpik altına saldı. Ayın 17-si isə tapşırığı ilə işdən çıxarıldım”, - deyə zərərçəkmiş bildirib.
Elşən Məlikovun sözlərinə görə, işdən çıxarılandan sonra bir neçə yerə müraciət edib. Nəhayət Qida Təhlükəsizliyi Agentliyinin Lənkəran regional bölməsində işə düzəlib: “Sağ olsun müəssisənin rəhbəri Samit müəllim, məni işə götürdü. Lakin Rəsilə Əliyeva və onun yaxını Polad İmaməliyevin mənə qarşı təhdid və təzyiqləri bitmədi. Ailəm də bu basqılardan yorulub məndən üz döndərdi və boşandıq. Artıq yorulmuşam. Həyatım təhlükə altındadır. İstəyirəm ki, Lənkəran polisi məsələni nəzarətə götürsün”, - deyə şikayətçi əlavə edib.
