Lənkəran Ağır Cinayətlər Məhkəməsində qəsdən sağlamlığa ağır zərər vurmaqda təqsirləndirilən Emin Qəfərovun cinayət işi üzrə məhkəmə prosesi yekunlaşıb.
Pravda.az xəbər verir ki, hadisə bu il mayın 26-da Biləsuvar şəhərində, Ə.Kürçaylı küçəsində baş verib.
Məlumata görə, Emin Qəfərov əmisi oğlu Elvin Qəfərovun ailə üzvlərinə nalayiq ifadələr işlətməsinə görə onunla mübahisə edib. Mübahisə zamanı təqsirləndirilən şəxs evdən götürdüyü mətbəx bıçağı ilə əmisi oğluna bir zərbə vurub. Nəticədə Elvin Qəfərov ağır xəsarət alıb.
Hadisədən sonra Emin Qəfərov saxlanılaraq ev dustaqlığına buraxılıb. Sonradan əmioğlanları barışıb və zərərçəkmişin şikayəti olmayıb.
Məhkəmənin hökmü ilə Emin Qəfərov şərti cəza ilə azadlığa buraxılıb.
