Astara rayon icra hakimiyyətinin başçısı Qəzənfər Ağayevin Şuvi kənd inzibati ərazi dairəsi üzrə nümayəndəliyinin Siyətük kəndində keçirdiyi səyyar qəbul-görüşdə rayonun idarə və müəssisələrinin rəhbərləri iştirak ediblər. Bu haqda məlumatı Cenublu.az bu gün, 1 may tarixində verir.
İcra başçısı son illər Siyətük, Şuvi və Deqadi kəndlərində müasir tipli yeni məktəb binalarının tikilməsindən, Ərçivan-Şuvi-Siyətük-Alaşa-Qapıçıməhəllə dairəvi avtomobil yolunun çəkilməsindən, elektrik xətt təsərrüfatında təmir işlərinin aparılmasından, yeni transformatorların quraşdırılmasından, Deqadi və Səlivə kəndlərinə qaz xətti çəkilməsindən danışıb. Hazırda Sərək kənd tam orta məktəbi üçün 360 şagird yerlik yeni binanın tikintisi davam edir.
Sakinlər çıxış edərək məhəllədə əlavə elektrik transformatorunun qoyulmasına, kənddə qazılmış subartezian quyusunun bərpa edilməsinə, evlərə internet xətlərinin çəkilişinin sürətləndirilməsinə, Siyətük-Şuvaş avtomobil yolunun təmirinə köməklik göstərilməsini xahiş ediblər.
Sonda icra başçısı inşası aparılan Sərək kənd tam orta məktəbində və əsaslı təmir olunan Çayoba-Astara avtomobil yolu üzərindəki Gəzəndaş körpüsündə tikinti işləri ilə tanış olub, tövsiyə və tapşırıqlarını verib.
