Bu gün Azərbaycan, ingilis və talış dillərinin tədqiqatçısı, poliqlot dilçi, filologiya elmləri doktoru Əbülfəz Rəcəblinin doğum günüdür.
Əbülfəz Rəcəbli 1936-cı ildə mayın 6-sı Lənkəran şəhərində anadan olub.
O, 1954-cü ildə Azərbaycan Dövlət Universitetinə (indiki BDU) daxil olub və 1959-cu ildə Filologiya fakültəsini fərqlənmə diplomu ilə bitirib. 1971-ci ildə Azərbaycan Dövlət Pedaqoji Xarici Dillər İnstitutunun İngilis dili fakültəsində təhsilini tamamlayıb. 1985-ci ildə isə Marksizm-leninizm universiteti İdeoloji kadrlar fakültəsinin beynəlxalq münasibətlər şöbəsini fərqlənmə diplomu ilə bitirib.
1959-1963-cü illərdə nəşriyyatlarda əvvəlcə korrektor, sonra redaktor işləyib.
1963-cü ildə BDU-nun aspiranturasına daxil olub və Qırğızıstan EA-ya ezam edilib. 1967-ci ilin dekabrında “Qədim türk yazısı Orxon-Yenisey abidələrinin dili. Morfologiya” mövzusunda namizədlik, 1978-ci ilin martında “Orxon-Yenisey abidələri dilində feilyaratma” mövzusunda doktorluq dissertasiyasını müdafiə edib.
Ə.Rəcəbli “Məktəblinin talışca-azərbaycanca lüğəti”, “Talış dilinin orfoqrafiya lüğəti”, “Talışlar və talış dili”, “Talış dilinin fonetikası” və Ə.Əliyevlə birgə yazdığı IV siniflər üçün “Talış dili” dərslikləri, "Orxon-Yenisey abidələri dilində felin məna növləri", "Orxon-Yenisey abidələri dilində felin tərzləri", "Orxon-Yenisey abidələri" və "Uyğurlar", "Qədim türkcə-azərbaycanca lüğət", "Göytürk dilinin fonetikası", "Göytürk dilinin morfologiyası", "Göytürk dilinin sintaksisi", "Ulu türklər" və başqa kitabların müəllifidir.
