Masallı “ASAN Həyat” Kompleksində Ombudsmanın Cənub Regional Mərkəzinin açılış mərasimi keçirilib. Bu haqda məlumatı Cenublu.az bu gün, 5 avqust tarixində Azərbaycan Respublikasının İnsan Hüquqları üzrə Müvəkkilin rəsmi Facebook səhifəsinə istinadən verir.
Tədbirdə İnsan Hüquqları üzrə Müvəkkil Səbinə Əliyeva Masallı və ətraf rayonlardan ünvanlanan müraciətlərin daha operativ baxılması və yerində araşdırılmasına şərait yaradacaq Cənub Regional Mərkəzində mövcud olan elektron yeniliklərin Ombudsman və onun Aparatının vəzifəli şəxsləri tərəfindən qəbul imkanlarını genişləndirdiyini qeyd edib.
Həmçinin S.Əliyeva Cənub Regional Mərkəzinin Masallı “ASAN” Həyat Kompleksində yerləşməsi ərizəçilərin sənədləşmə və bir çox məsələlərlə bağlı müraciətlərinin yerində həllinə imkan yaradacağını vurğulayıb.
Daha sonra Masallı Rayon İcra Hakimiyyətinin başçısı Araz Əhmədov, Azərbaycan Respublikası Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin sədr müavini Ceyhun Salmanov və vətəndaş cəmiyyəti nümayəndələri adından Azərbaycan Milli QHT Forumunun prezidenti Rauf Zeyni çıxış ediblər.
Yekunda Ombudsman tədbirdə iştirak edən dövlət qurumları və vətəndaş cəmiyyəti institutlarının nümayəndələri ilə görüş keçirib.
