Şirvan Apellyasiya Məhkəməsində Masallı rayonunda qətl törətməkdə təqsirləndirilən Aslan Ağazadənin barəsində çıxarılmış hökmdən verilmiş apellyasiya şikayəti üzrə məhkəmə prosesi başa çatıb.
Pravda.аz xəbər verir ki, prosesin sonunda məhkəmə qərar elan edib. Qərara əsasən, zərərçəkmiş şəxsin hüquqi varisi tərəfindən verilmiş apellyasiya şikayəti təmin edilməyib və birinci instansiya məhkəməsinin hökmü qüvvədə saxlanılıb.
Xatırladaq ki, Lənkəran Ağır Cinayətlər Məhkəməsinin hökmü ilə Aslan Ağazadənin Cinayət Məcəlləsinin 120.2.1 (qabaqcadan əlbir olan bir qrup şəxs tərəfindən qəsdən adam öldürmə), 120.2.4 (xüsusi amansızlıqla və ya ümumi təhlükəli üsulla adam öldürmə) və 232.1 (qanunsuz olaraq odlu silah əldə etmə, saxlama, gəzdirmə) maddələri ilə nəzərdə tutulan əməlləri anlaqsız vəziyyətdə törətdiyi müəyyən edilib. Bu səbəbdən o, cinayət məsuliyyətindən azad olunub və barəsində ixtisaslaşdırılmış psixiatriya stasionarında məcburi müalicə təyin edilib.
Masallı Rayon Məhkəməsinin qərarı ilə Aslan Ağazadə barəsində əvvəlcədən seçilmiş həbs qətimkan tədbiri dəyişdirilməyib. Hökm qanuni qüvvəyə minənədək onun xüsusi tibb müəssisəsinə yerləşdirilməsi formasında təhlükəsizlik tədbiri qüvvədə saxlanılıb. Qərarın icrası Səhiyyə Nazirliyinin 1 saylı Respublika Psixiatriya Xəstəxanasına həvalə olunub.
Hadisə 2024-cü il mayın 20-də Masallı rayonunun Yeddioymaq kəndində baş verib. 1971-ci il təvəllüdlü Seymur Alışanovun öldürülməsi ilə bağlı rayon prokurorluğuna məlumat daxil olub.
Araşdırmalar nəticəsində Masallı rayonunun Qasımlı kənd sakini, 1994-cü il təvəllüdlü Aslan Ağazadənin aralarında yaranmış mübahisə zamanı odlu silahdan atəş açaraq və bıçaqla xəsarət yetirərək Seymur Alışanovu qəsdən öldürdüyünə dair əsaslı şübhələr müəyyən edilib.
Faktla bağlı Cinayət Məcəlləsinin 120.1-ci (qəsdən adam öldürmə) maddəsi ilə cinayət işi başlanılıb. Hadisənin qısqanclıq zəminində törədildiyi bildirilir.
