Masallı Rayon Məhkəməsində qəsdən sağlamlığa az ağır zərər vurmada təqsirləndirilən Vüqar Babazadənin (soyadı şərtidir) cinayət işi üzrə məhkəmə istintaqı yekunlaşıb.
Pravda.az məlumat verir ki, hakim Elşən Hüseynovun sədrliyi ilə keçirilən prosesdə hökm oxunub.
Məhkəmənin hökmü ilə o, 1 il 11 ay 26 gün müddətə azadlığın məhdudlaşdırılması (elektron qolbaq) cəzasına məhkum olunub.
İttihama görə, hadisə 17 dekabr 2024-cü il tarixdə, saat 18 radələrində Masallı-Xallıcallı avtomobili yolunun Masallı rayonu, Qarğalıq kəndi ərazisindən keçən hissəsində qeydə alınıb.
Belə ki, 2003-cü il təvəllüdlü Vüqar Babazadə yol kənarında olarkən həmin vaxtı “Mersedes Benz 190” markalı avtomobillə hərəkət edən rayonun Xallıcallı kənd sakini, əvvəllər tanıdığı zərərçəkmiş Elburus Qulamova (soyadı şərtidir) əli ilə işarə edib dayandırıb. O, Elburusa onun oğlu ilə arasında əvvəllər baş vermiş narazılığa görə iradlar bildirib. Narazılıq isə Vüqarın xalası oğlu ilə zərərçəkmiş şəxsin oğlunun qız söhbəti olub.
Sonra Vüqar qəsdən təpik və başla Elburusun sağ əlinə və üz nahiyəsinə vuraraq ona bədən xəsarətləri yetirib.
Hadisədən sonra Vüqar Babazadə saxlanılaraq cinayət məsuliyyətinə cəlb edilib.
