Masallıda 70-ə yaxın arı ailəsi məhv olub.
Cenublu.az xəbər verir ki, iddialara əsasən, Masallı rayonunun Sığıncaq kəndində bir neçə nəfərə məxsus arı təsərrüfatı zəhər verilərək məhv edilib. Hadisə nəticəsində ümumilikdə 70-dən çox arı ailəsi tələf olub.
Belə ki, Astaranın Miki kənd sakini Təcib Rüstəmov bildirib ki, 35 arı ailəsini daha keyfiyyətli bal əldə etmək məqsədilə müvəqqəti olaraq Sığıncaq kəndindəki örüş sahəsinə yerləşdirib. Onun sözlərinə görə, bir neçə gün əvvəl naməlum şəxslər tərəfindən təsərrüfatına zəhərli maddə yeridilib və nəticədə arılar zəhər verilərək məhv edilib.
“Axşamçağı əmioğlum zəng etdi ki, qonşuda arıları qırıblar. Sonra mənə də zəng edib dedi ki, sənin arıların da tələf olub. Gecə saat 11-də gəlib arıxanaya baxdım. Gördüm ki, arı ailələrinin hamısı ölüb. Tam dolu yeşiklər məhv olub. Zəhərli dərmanlardan istifadə ediblər. Çöldə cəmi 5-10 arı qalıb. Ümumilikdə 35 arı ailəsi tamamilə tələf olub” - deyə Təcib Rüstəmov bildirib.
Oxşar hadisə kənd sakini Səid Əhmədovun həyətindəki arı təsərrüfatında da baş verib. Burada isə təxminən 40 arı ailəsi zəhər verilərək məhv edilib.
Təsərrüfat sahibləri bildirirlər ki, arı yeşiklərində artıq toplanmış bal da yararsız hala düşüb və istifadəsi təhlükəli ola bilər. Onların sözlərinə görə, hadisə nəticəsində ümumilikdə 30 min manatdan çox maddi ziyan dəyib.
Faktla bağlı polisə məlumat verilib. Qida Təhlükəsizliyi Agentliyinin əməkdaşları əraziyə gələrək laborator analizlər üçün nümunələr götürüblər.
