Azərbaycan Silahlı Qüvvələrinin çavuşu, şəhid Nayib Qasımovun doğum günüdür.
Nayib Akif oğlu Qasımov 12 iyun 1997-ci ildə Masallı rayonunun Mahmudavar kəndində anadan olub. 2004-2014-cü illərdə kəndin məktəbində təhsil alıb. 2015-2017-ci illərdə Azərbaycan Silahlı Qüvvələrinin “N” saylı hərbi hissəsində müddətli həqiqi xidmət edib və həmin dövrdə bir neçə dəfə nümunəvi hərbi xidmətinə görə fəxri fərmanlarla təltif olunub.
Hərbi xidməti bitirəndən sonra könüllü olaraq ordu sıralarında qalıb. 3 aylıq hazırlıq kursu keçəndən sonra çavuş rütbəsində hərbi qulluqçu kimi Azərbaycan Ordusunun Xüsusi Təyinatlı Qüvvələrinin “N” saylı hissəsində xidmət etməyə başlayıb.
2016-cı ilin Aprel döyüşlərində Lələtəpə uğrunda və 2020-ci ilin Tovuz döyüşlərində iştirak edib. Aprel döyüşlərində göstərdiyi rəşadətə görə “Azərbaycan Ordusunun 100 illiyi” yubiley medalına layiq görülüb.
Vətən müharibəsi zamanı kəşfiyyatçı kimi həmişə öndə olub. Göstərdiyi şücaətə görə döyüş səngərində baş çavuş rütbəsinə layiq görülüb.
O, 5 oktyabr 2020-ci il tarixində Cəbrayıl rayonunun bir neçə kəndinin mənfur düşmənlərdən təmizlənməsində igidlik göstərib. Şəhid yoldaşlarının nəşini döyüş meydanından çıxararkən başından aldığı qəlpə yarasından özü də şəhid olub. Nayib Qasımovun nəşi oktyabrın 6-da doğulub boya-başa çatdığı Mahmudavar kəndində böyük izdihamla son mənzilə yola salınıb.
Nayib Qasımov ölümündən sonra “Vətən uğrunda”, “Cəbrayılın azad olunmasına görə” və “Hərbi xidmətlərə görə” medalları ilə təltif edilib.
