Azərbaycan Dövlət Aqrar Universitetinin (ADAU) rektoru, AMEA-nın müxbir üzvü, professor İbrahim Cəfərov başda olmaqla universitetin bir qrup professor-müəllim heyəti universitetin tələbəsi olmuş, əslən Masallıdan olan şəhid Niyaməddin Sultanzadənin məzarını ziyarət ediblər. Bu haqda məlumatı Cenublu.az bu gün, 27 iyul tarixində Masallı Rayon İcra Hakimiyyətinə istinadən verir.
Universitet kollektivi əvvəlcə Masallı RİH-nin başçısının birinci müavini Məmmədhüseyn Hüseynov və rayonun ictimaiyyət nümayəndələri ilə birgə Qəhrəmanlar Parkı - Şəhidlər abidə-kompleksini ziyarət edib, torpaqlarımızın bütövlüyü uğrunda canlarından keçən Vətən övladlarının, həmçinin şəhid Niyaməddin Sultanzadənin məzarını ziyarət edib, önünə tər gül dəstələri düzüb.
Sonra şəhid Niyaməddin Sultanzadənin doğulduğu evə baş çəkilib. Evdə şəhidin xatirəsinə yaradılan guşə ilə tanışlıq olub.
Qeyd edək ki, Niyaməddin Hüsaməddin oğlu Sultanzadə 10 sentyabr 1998-ci il tarixdə Masallı şəhərində anadan olub. 2005-2016-cı illərdə şəhər 1 nömrəli tam orta məktəbdə təhsil alıb. Orta təhsilini başa vurduqdan sonra 2016-2017-ci illərdə Azərbaycan Silahlı Qüvvələrində, “N” saylı hərbi hissədə xidmət etməyə başlayıb. 10 oktyabr 2018-ci ildən 3 saylı Regional SuKanal İdarəsinin Masallı sukanal sahəsində xlorator-sutəmizləyici qurğularının operator peşəsi üzrə çalışıb.
Azərbaycan Dövlət Aqrar Universitetinin Aqronomluq fakültəsinin (qiyabi) ikinci kurs tələbəsi olub. Vətən müharibəsi zamanı Füzuli və Cəbrayıl rayonları uğrunda gedən döyüşlərdə düşmənlərə qarşı böyük mərdliklə vuruşub və Qubadlı uğrunda gedən döyüşlərdə qəhrəmancasına şəhid olub.
22 noyabr 2020-ci il tarixdə Masallı şəhər Dadva qəbiristanlığında dəfn olunub.
Ölümündən sonra “Vətən uğrunda”, “Cəbrayılın azad olunmasına görə”, “Qubadlının azad olunmasına görə” və “Cəsur döyüşçü” medalları ilə təltif edilib.
