Masallı Rayon İcra Hakimiyyəti başçısının Ərkivan qəsəbə inzibati ərazi dairəsi üzrə nümayəndəsi Əhməd İlyas oğlu Əhmədov "Dövlət qulluğunda fərqlənməyə görə" medalı ilə təltif olunub. Bu haqda məlumatı Masallı Rayon İcra Hakimiyyətinin rəsmi Facebook səhifəsi verib.
Əhməd Əhmədov 12 sentyabr 1961-ci ildə Masallı rayonunun Ərkivan kəndində anadan olub. Bədirli orta məktəbini bitirdikdən sonra Sovet Ordusu sıralarında xidmət edib.
1983-1988-ci illərdə N.A.Voznosenski adına Leninqrad Maliyyə-İqtisad İnstitutunun Bakı filialını bitirib. Əmək fəaliyyətinə 2 nömrəli Bakı Şərab Zavodunda başlayıb. Daha sonra Masallı Quraşdırma İdarəsində, Masallı Tara Müəssisəsində işləyib.
2002-2021-ci illərdə Masallı Rayon İcra Hakimiyyəti başçısının Ərkivan qəsəbə inzibati ərazi dairəsi üzrə nümayəndəsinin müavini vəzifəsində çalışıb. Hazırda Masallı RİHB-nın Ərkivan qəsəbə inzibati ərazi dairəsi üzrə nümayəndəsidir.
2002-ci ildən Yeni Azərbaycan Partiyasının üzvüdür.
