Masallı şəhər Nizami Gəncəvi adına Mədəniyyət evində Masallı Rayon İcra Hakimiyyəti başçısı yanında növbəti şura iclası keçirilib. Bu haqda məlumatı qurumun rəsmi Facebook səhifəsi verib.
İclasda rayon İcra Hakimiyyətinin başçısı Şahin Məmmədov və aparatı, hüquq-mühafizə orqanlarının, müəssisə və təşkilat rəhbərləri, kəndlər, qəsəbələr və şəhər inzibati ərazi dairəsi üzrə nümayəndələr və qərargah üzvləri iştirak ediblər.
İcra Hakimiyyətinin başçısı Şahin Məmmədov gündəlikdə duran əsas məsələlərdən biri - ev təsərrüfatının uçotunun aparılması və rayonda peyvəndləşmənin gedişi barədə tədbir iştirakçılarına məlumat verib, yol verilmiş nöqsanlarla bağlı məsul şəxslərə iradlarını bildirib, şəffaflığın təmin olunması, ayrı-ayrı şəxslərin vəzifə məsuliyyətinin artırılması ilə bağlı şura iclasında geniş məlumat verib.
Rayon rəhbəri həmçinin Masallı şəhərində 1, Boradigah qəsəbəsində 2, Musaküçə, Şıxlar, Miyankü və Qızılavarda kəndlərinin hərəsində 1 qanunsuz tikilinin olması barədə iradını bildirib. Həmçinin, ötən il rayon ərazisində 115 minə yaxın ağacın əkilməsini, cari ildə bu işi davam etdirməyi və Güllütəpə kəndi ərazisindən keçən yerdə yeni bağların salınmasını tapşırıb.
İclasda fəalları maraqlandıran suallar cavablandırılıb.
Şura iclasının sonunda müzakirə olunan məsələlərlə bağlı müvafiq qərarlar qəbul edilib.
