Masallıda quşların elektrik xətlərindən qorunması üçün yeni tədbirlər görüləcək. Bu haqda məlumat bu gün, 11 yanvar tarixində "AzərEnerji" ASC-nin rəsmi saytında paylaşılıb.
Belə ki, quşların xətlərə toxunması nəticəsində həm quşlar tələf olurlar, həm də elektrik naqilləri zərər görür. Quşların məhv olmasının qarşısının alınması və elektrik naqillərinin qorunması məqsədi ilə xüsusi avadanlıqlar quraşdırılacaq.
"Azərenerji" ASC tərəfindən, IDEA İctimai Birliyi və Ekologiya və Təbii Sərvətlər Nazirliyinin dəstəyi ilə ilkin olaraq quşların ən çox tələf olduğu müşahidə edilən Masallı və digər rayonlarda quraşdırılma işləri aparılacaq. Ərazidən keçən hava xətlərində polimer materialdan hazırlanmış xüsusi konus tipli qurğular quraşdırılacaq. Növbəti mərhələdə bu cür qurğuların ölkənin digər rayonlarında da quraşdırılması nəzərdə tutulur.
