Masallı rayonu M.Hacıyev adına Ərəb kənd orta məktəbində “Vətən müharibəsi” şəhidinin doğum günü ilə əlaqədar tədbir keçirilib. Bu haqda məlumat bu gün, 7 yanvar tarixində Masallı Rayon Təhsil Şöbəsinin rəsmi Facebook səhifəsində paylaşılıb.
Şəhid Masim Qurbanovun xatirəsinə keçirilmiş tədbirdə Masallı RİH nümayəndələri, şəhidin atası və yaxınları, həmçinin digər şəhidlərin doğmaları və kənd sakinləri iştirak ediblər. Şəhidlərin xatirəsi 1 dəqiqəlik sükutla yad edilib.
Masim Qurbanov 7 yanvar 2001-ci ildə Masallı rayonunun Ərəb kəndində anadan olub. İgidimiz, 27 sentyabr 2020-ci ildə başlanan “Vətən müharibəsi”nə könüllü olaraq yollanıb. Masim Qurbanov Cəbrayıl, Füzuli, Zəngilan, Qubadlı istiqamətində gedən döyüşlərdə iştirak edib. Qəhərman döyüşçü Qubadlı istiqamətində gedən döyüşlərdə 30 oktyabr tarixində düşmən gülləsinə tuş gəlib, şəhidlik zirvəsinə ucalıb.
Şəhid 10 yanvar 2021-ci ildə doğma kəndində torpağa tapşırılıb. Masim Qurbanov ölümündən sonra "Vətən uğrunda","Qubadlının azad olunmasına görə", "Cəbrayılın azad olunmasına görə" və "Cəsur döyüşçü" medalları ilə təltif edilib.
