Cəlilabad rayonunun Məmmədrzalı kəndində hələ də təbii qaz təminatının olmaması ilə bağlı sakinlərin şikayətlərinə “Azəriqaz” İstehsalat Birliyi münasibət bildirib.
Cenublu.az-ın sorğusuna cavab olaraq qurumdan bildirilib ki, regionlarda qazlaşdırma prosesi mərhələli şəkildə və maliyyə imkanları çərçivəsində həyata keçirilir.
“Cəlilabad rayonunun Məmmədrzalı kəndinin qazlaşdırılmasına da Birliyin maliyyə imkanlarından asılı olaraq, növbəti mərhələlərdə baxıla bilər. Qeyd edək ki, hazırda rayon üzrə qazlaşma səviyyəsi 87,6% təşkil edir”, – deyə Azəriqaz İB-nin cavabında qeyd olunub.
Xatırladaq ki, Cenublu.az-a müraciət edən kənd sakinləri illərdir təbii qazın yoxluğundan əziyyət çəkdiklərini, xüsusilə qış aylarında istilik təminatının böyük çətinlik yaratdığını bildiriblər. Onların sözlərinə görə, bu vəziyyət yaşlılar, uşaqlar və xəstə insanlar üçün daha ağır nəticələrə səbəb olur.
