Bu gün Lerikdən olan şəhid Cavanşir Namiq oğlu Həmidlinin anım günüdür.
Cavanşir Həmidli 1997-ci ildə oktyabrın 20-si Çayrud kəndində anadan olub.
2019-cu ilin iyul ayında Lerik rayon Hərbi komissarlığı tərəfindən həqiqi hərbi xidmətə çağırılan Cavanşir Həmidli Milli Ordunun "N" saylı "Həmlə" Əlahiddə Əməliyyat Taborunun xüsusi təyinatlısı kimi hərbi təlimlərə qatılaraq hərbi texnikanın və döyüş silahlarının istifadəsini yüksək səviyyədə mənimsəməklə hərbi hissə rəhbərliyinin rəğbətini qazanıb.
2020-ci ildə başlanan Vətən müharibəsi zamanı Cavanşir tabor yoldaşları ilə birgə torpaqlarımızın düşmən işğalından azad edilməsi üçün döyüşə qatılıb. Tərtər-Ağdərə istiqamətində Talış və Suqovuşan yaşayış məntəqələrinin, bir sıra strateji yüksəkliklərin alınmasında yüksək fədakarlıq və şücaət göstərərək onlarla erməni əsgərini məhv edib. Sonradan Füzuli və Cəbrayıl rayonlarının istiqamətində gedən döyüşlərdə qəhrəmancasına vuruşub. Döyüşlər zamanı öz həyatını təhlükəyə ataraq bir neçə yaralı əsgər yoldaşını döyüş zonasından böyük əzmkarlıq və rəşadət göstərərək çıxarıb.
Əsgər Həmidli oktyabrın 7-si Cəbrayıl rayonunun Nüzgar kəndi uğrunda gedən döyüşlər zamanı şəhidlik zirvəsinə ucalıb.
Ölümündən sonra "Füzulinin azad olunmasına görə", "Cəbrayılın azad olunmasına görə" və "Vətən uğrunda" medalları ilə təltif edilib.
