İkinci Dünya Müharibəsi zamanı itkin düşmüş azərbaycanlı əsgər Məmməd Fəttah oğlu Xudaverdiyevin qalıqları 82 il sonra Rusiyanın Smolensk vilayətində tapılıb.
1918-ci ildə Lerik rayonunda anadan olan Məmməd Xudaverdiyev 1942-ci ildə Sovet Ordusuna çağırılıb. O, əvvəlcə Krım və Sevastopol döyüşlərində iştirak edib, daha sonra isə Smolensk vilayətinə göndərilib. 1943-cü ilin yanvarından sonra onunla əlaqə kəsilib və o, itkin düşmüşlər siyahısına salınıb.
Əsgərin şəxsiyyəti Rusiya axtarış qruplarının apardığı əməliyyat zamanı onun şəxsi əşyaları arasından tapılmış imzalı qaşıq vasitəsilə müəyyən edilib. Araşdırmalara görə, o, Smolensk vilayətinin Verdino kəndinə edilən hücum zamanı həlak olub.
Lerik Rayon İcra Hakimiyyətindən caliber.az-a verilən məlumata görə, axtarışlarda müsbət nəticə mərhumun qohumu – Bakıda yaşayan 64 yaşlı qardaşı oğlu Həsənağa Xudiyevin tapılmasından sonra əldə edilib.
Ailə hazırda əsgərin qalıqlarını Bakıda və ya əvvəllər yaşadıqları Yardımlı rayonunda dəfn etməyi planlaşdırır.
Məmməd Xudaverdiyev ailəsi Bakıya köçdükdən sonra orduya çağırılıb. 1947-ci ildə atası Fəttah Teymur oğlu Xudaverdiyev onun tapılması üçün Hərbi Komissarlığa müraciət etsə də, bu cəhdlər nəticəsiz qalmışdı.
82 ildən sonra Xudaverdiyevlər ailəsi, nəhayət, gözlədikləri xəbəri aldı.
