Lənkəran rayonu ərazisində hərəkətdə olan "Kia" markalı avtomobilin sürücüsü təhlükəsizlik kəmərindən istifadə etmədiyi üçün Lənkəran Şəhər Rayon Polis Şöbəsinin Dövlət Yol Polisi Bölməsinin əməkdaşları tərəfindən saxlanılıb.
Cenublu.az xəbər verir ki, yoxlama zamanı sürücü H.Kəlbizadənin narkotik vasitədən istifadə etməsinə dair şübhələr yarandığından o, tibbi müayinədən keçirilib. Müayinə nəticəsində həmin şəxsin kirayə götürdüyü avtomobili psixotrop maddənin təsiri altında idarə etdiyi müəyyən olunub.
Bundan başqa, Lənkəran şəhəri ərazisində dövlət qeydiyyat nişanlarından biri olmadan idarə edilən "Daewoo" markalı avtomobil də yol polisi əməkdaşları tərəfindən saxlanılıb. Müvafiq müayinə zamanı həmin avtomobilin sürücüsü Ş.Səfərlinin də narkotik vasitədən istifadə etdiyi müəyyən edilib.
Hər iki sürücü barəsində inzibati protokol tərtib olunaraq baxılması üçün aidiyyəti üzrə məhkəməyə göndərilib.
