Lənkərandan olan tanınmış alim, filologiya elmləri doktoru, professor Məsud Mahmudov “Tərəqqi” medalı ilə təltif edilib.
Məsud Əhməd oğlu Mahmudov 1951-ci ildə Lənkəran rayonunun Boladi kəndində müəllim ailəsində anadan olub. O, 1976-cı ildən Azərbaycan Milli Elmlər Akademiyasının Nəsimi adına Dilçilik İnstitutunda fəaliyyət göstərir.
Professor 1985–1988-ci illərdə institutun elmi katibi, 1988–2013-cü illərdə elmi işlər üzrə direktor müavini və eyni zamanda Nəzəri və tətbiqi dilçilik şöbəsinin müdiri olub. Hazırda isə Kompüter dilçiliyi şöbəsinə rəhbərlik edir.
Məsud Mahmudov internetdə geniş istifadə olunan “Poliqlot” lüğətlər kompleksinin və “Dilmanc” maşın tərcüməsi sisteminin yaradılmasında mühüm rol oynayıb. Onun rəhbərliyi altında 30-a yaxın fəlsəfə doktoru və 8 elmlər doktoru yetişib.
Qeyd edək ki, professor Məsud Mahmudov həmçinin Türk Dünyası Araşdırmaları Beynəlxalq Elmlər Akademiyasının həqiqi üzvüdür və bu qurumun “Beynəlxalq qızıl ulduz” medalı ilə də təltif olunub.
