Bu gün Vətən müharibəsi şəhidləri Vüsal Hüseynov və Qalib Nurizadənin doğum günüdür.
Dövlət Sərhəd Xidmətinin Sərhəd Qoşunlarının əsgəri Vüsal Hüseynov 2001-ci ildə iyunun 10-u Lənkəran rayonunun Velədi kəndində anadan olub.
2019-cu ilin oktyabr ayından Sərhəd Qosunlarının müddətli həqiqi xidmət hərbi qulluqçusu idi. Vətən müharibəsinin bitməsinə az qalmış, 8 noyabr 2020-ci ildə Zəngilan rayonunda döyüş tapşırığının yerinə yetirilməsi və əks-hücumun dəf edilməsi zamanı şəhid olub.
Ölümündən sonra “Vətən uğrunda”, “İgidliyə görə”, “Zəngilanın azad olunmasına görə” və “Cəbrayılın azad olunmasına görə” medalları ilə təltif olunub.
Qalib Nurizadə 1996-cı ildə iyunun 10-u Lənkəran rayonunun Gəgiran kəndində dünyaya göz açıb. Vətən müharibəsinin son günü, 10 noyabr 2020-ci ildə düşmən artilleriyasına tuş gələrək Şuşa istiqamətində gedən döyüşlərdə qəhrəmancasına şəhidlik zirvəsinə ucalıb.
Ölümündən sonra “Vətən uğrunda”, “Füzulinin azad olunmasına görə”, “Şuşanın azad olunmasına görə”, “Şücaətə görə” və “Cəsur döyüşçü” medalları ilə təltif edilib.
