Lənkəranda kompüter tomoqrafiyasından (KT) keçən xəstələr 5 gündür ki, nəticələrin cavablarını ala bilmirlər.
Cenublu.az-a müraciət edən vətəndaşların sözlərinə görə, Lənkəran Rayon Mərkəzi Xəstəxanasının (LRMX) radiologiya və kompüter tomoqrafiya şöbəsində müayinədən keçmiş pasiyentlər cavablarını vaxtında əldə edə bilmirlər.
Xəstələrin yaxınları bildirirlər ki, artıq 4–5 gündür müayinə olunsa da, nəticələr təqdim edilmir. “Atamı böyrək əməliyyatına aparmalıyam. 4 gündür evdə ağrılardan əziyyət çəkir. Həkim isə müayinə cavabları olmadığı üçün əməliyyat edə bilmir. Hər dəfə müraciət etdikdə ‘sistem işləmir’ deyə bəhanə gətirilir”, – deyə vətəndaşlardan biri şikayət edib.
Məsələ ilə bağlı xəstələrin müraciət etdiyi həkim Ramin Babayev də eyni cavabı verib: “Sistem işləmir, ona görə cavabları təqdim edə bilmirik”.
Vətəndaşlar problemin həlli üçün LRMX-nın direktor müavini və hazırda direktor vəzifəsini icra edən doktor Nuridə xanıma müraciət etsələr də, heç bir rəsmi cavab ala bilmədiklərini deyirlər. Onların sözlərinə görə, Nuridə xanımın təyinatından sonra xəstəxanada bu kimi halların sayı artıb.
Şikayətçilər aidiyyəti qurumlardan Lənkəran Rayon Mərkəzi Xəstəxanasında yaranmış vəziyyətin aradan qaldırılması üçün tədbir görülməsini xahiş edirlər.
Qeyd edək ki, məsələ ilə bağlı TƏBİB-ə sorğu ünvanlanıb.
View this post on Instagram
